Кулінарныя майстар-класы - лепшы рэцэпт для шчасця

Лета пакуль з намі і сумаваць выхаванцам Гарадзейскай школы-інтэрната сапраўды не даводзіцца! Наш праект "Дорым прафесію" працягваецца! Добра, калі ў цябе ёсць сябры ў рэстаране "Гараж", бо ў іх сапраўды ёсць рэцэпт вясёлага і карыснага вольнага часу. Нашы юныя кухары зноў надзелі фартухі і галаўныя ўборы, каб прыгатаваць самую смачную піцу сваімі рукамі.

Шоу пачалося! Некаторыя раскочвалі цеста ўжо як сапраўдныя піцамейкеры, іншыя ваявалі з качалкай даўжэй і пакуль спраўляліся не так хутка. Але гэта не важна! Важна, што прагрэс у вучняў сапраўды ёсць!

Адзін з галоўных і лепшых момантаў - афармленне самой піцы! Вось яно - поле для фантазіі! Дзеці па-асабліваму выкладвалі інгрэдыенты, упрыгожвалі, імкнуліся - рабілі цэлыя творы мастацтва. Перад тым, як адправіць піцу ў печ, дзяцей папрасілі прыдумаць назву свайму кулінарнаму шэдэўру, каб потым адшукаць яго, паспрабаваць самому ці забраць з сабой у школу і пачаставаць сяброў.

«Сёння ў дзяцей было кулінарнае свята, – падзялілася ўражаннямі выхавацель Гарадзейскай школы-інтэрната Буглай Лілія, – Назіраючы з боку, наколькі яны былі ўцягнутыя ў працэс, выснову можна зрабіць адно – яны былі шчаслівыя! Дзякуй за запрашэнне!».