«Дзіцячы дабрачынны сацыяльна-рэабілітацыйны цэнтр»

Дзіцячы дабрачынны сацыяльна-рэабілітацыйны цэнтр Св. Лукі працуе з 2003 года.
Мы можам безкаштоўна размясціць да 20 сем'яў, якія праходзяць абследванне, лячэнне ці рэабілітацыю ў Рэспубліканскім навукова-практычным цэнтры дзіцячай анкалогіі, гематалогіі і імуналогіі ў Бараўлянах. Дзеці з бацькамі паступаюць да нас па кірунку клінікі.
Прыязджаюць да нас не толькі з далёкіх куткоў Беларусі, але і, напрыклад, з Украіны, Расіі, Азербайджана.
Кожная сям'я для пражывання мае свай асобны пакой з санвузлом і душавой. Ежу гатуюць на агульнай кампактнай кухні. Мы заўсёды імкнемся стварыць хатнюю абстаноўку, забяспечыўшы самым неабходным, падтрымліваем псіхалагічна, матэрыяльна і духоўна.



Умовы пражывання ў цэнтры Св. Лукі і яго тэрытарыяльнае размяшчэнне спрыяюць добраму працэсу рэабілітацыі дзяцей і іх хутчэйшаму выздараўленню. У 2018 годзе ў нас адкрыўся сэнсарны пакой - памяшканне, якое наведваюць дзеці з бацькамі падчас лячэння і праходжання курсу хіміятэрапіі ў РНПЦ. Заняткі праходзяць у гульнявой форме пад ціхія гукі спакойнай музыкі. Сэнсарны пакой дапамагае зняць псіхічнае напружанне, стварае адчуванне спакою. Таксама ёсць яркі і ўтульны гульнявы пакой, абсталяваны прыгожымі, якаснымі і бяспечнымі цацкамі, дзе ў нашых дзяцей ёсць магчымасць цікава праводзіць вольны час.

На тэрыторыі цэнтра ёсць дзіцячая гульнявая пляцоўка, якая разлічана для дзяцей рознага ўзросту. Пясочніцы, арэлі, батут, разнапланавыя комплексы для актыўнай гульні. Тут кожнае дзіця знойдзе сабе занятак.
Побач з цэнтрам размешчаны лес, дзе можна прагуляцца на свежым паветры.