У Віцебску адбыліся велікапосныя рэкалекцыі для супрацоўнікаў Caritas Беларусі

Рэкалекцыі – гэта асаблівы час навяртання і паглыблення адносінаў з Богам, а гэта патрабуе цішыні, засяроджання і інтэнсіўнай малітвы.  Кожнаму з нас потрэбен такі час, у якім мы маем шчасце сабрацца, упарадкаваць свой свет, аднавіць сябе ў веры і малітве. У Віцебску адбыліся Вялікапосныя рэкалекцыі для супрацоўнікаў Caritas Беларусі. 

Разважанні праводзіў ксёндз канонік Валерый Марціноўскі, пробашч Віцебскага катэдральнага касцёла Езуса Міласэрнага.

Тэмай рэкалекцый стала ахвярнае служэнне Касцёла патрабуючым, хворым, абяздоленым і пакінутым людзям. І прыкладам такога служэння была выбрана постаць Папы Рымскага Францішка, які ў гэтым годзе адзначыў 11 год пантыфікату.

Віцебск стаў месцам для правядзення рэкалекцый невыпадкова, бо сёлета адзначаецца  25-годдзе заснавання Віцебскай дыяцэзіі.

Напрыканцы спаткання Святую імшу ўзначаліў біскуп Алег Буткевіч, які ўдзяліў усім прысутным урачыстае благаслаўленне на далейшую працу і ахвярнае служэнне людзям.